Hermann Giliomee

Hermann Giliomee was van 1982 tot 1998 professor in Staatswetenskap aan die Universiteit van Kaapstad. Hy was ’n genoot van die Yale-universiteit, die Universiteit van Cambridge en die Woodrow Wilson Center for International Scholars in Washington. Van 1995 tot 1997 was hy president van die Suid-Afrikaanse Instituut vir Rasseaangeleenthede. Hy is tans buitengewone professor in Geskiedenis aan die Universiteit van Stellenbosch.

Giliomee skryf gereeld oor die Suid-Afrikaanse geskiedenis en kontemporêre politiek en het vyftien boeke die lig laat sien, o.m. The Shaping of South African Society, From Apartheid to Nation-building en The Awkward Embrace: One-Party Domination and Democracy. Sy Die Afrikaners: ’n Biografie was ’n blitsverkoper in sowel Afrikaans as Engels en is ook deur die Virginia University Press in die VSA en Christopher Hurst & Co in die Verenigde Koninkryk uitgegee. Sy mees onlangse boek is Nog altyd hier gewees: die storie van ’n Stellenbosse gemeenskap.